«Дельта» деб номланувчи коронавируснинг «ҳиндча» штамми вакциналар шакллантирадиган ҳимояни енгиб ўтиши мумкин. Бу ҳақда «The New York Times» хабар берди.

Айтилишича, 30 июль куни АҚШ Касалликларни назорат қилиш ва профилактика марказида шундай мазмундаги маълумот тарқатилган. Марказ директори доктор Рошел П. Валенски «Дельта» штамми эмланган одамларнинг ҳам эмланмаган одамларнинг ҳам бурун ва томоғига бир хил миқдордаги вирус ташишини тан олган.

Маълум бўлишича, эмланганлар ҳам вирусни осонликча тарқатиши мумкин, лекин камроқ даражада. Валенски эмланган одамларда юқумли касалликни кам деб атаган, бироқ бошқа олимлар бундай одамларда касаллик илгари ўйлагандан кўра тез-тез учраб туришини тахмин қилган.

Дельта штаммлари MERS (Яқин Шарқ респиратор синдроми коронавируси), SARS (Ўткир нафас синдроми коронавируси), Эбола, оддий шамоллаш ва мавсумий гриппни келтириб чиқарадиган вирусларга қараганда анча кучли узатилади. Ҳужжатда айтилишича, у сувчечак каби юқумли.

Яқинда ўтказилган тадқиқотга кўра, Дельта варианти юқтирилганда, нафас йўлларида вирус миқдори вируснинг асл нусхаси билан касалланган одамларга қараганда 10 баробар кўп. Марказ эмланган одамларга ҳам ёпиқ жамоат жойларида ниқоб тақишни тавсия қилган, сабаби улар ёш болалар, қариялар ёки бошқа заиф одамлар билан алоқа қилишади.

Маълумот ўрнида: Сувчечак ўткир юқумли касаллик бўлиб, тана ҳароратининг кўтарилиши, тери ҳамда шиллиқ қаватларга пуфакчалар тошиши билан кечадиган касаллик саналади.

Аввалроқ коронавирус пандемияси тугашига нима тўсқинлик қилаётгани айтилган. Шунингдек, шифокорлар коронавирус билан оғриган беморларда яна бир хавфли асоратни аниқлаганди.