«Бугун суратлари» рукнининг бугунги сонини Туркияда юз бераётган ўрмон ёнғинларига бағишлаймиз.

Бир неча кундан буён Туркиянинг жанубий ҳудудлари олов ичида қолмоқда. Гап шундаки, мамлакатнинг Манавгат, Аланья, Адана, Бодрум, Мерсин ва Мармарис каби шаҳарлари яқинларида жойлашган ўрмонларда ёнғин келиб чиққан ва кучли шамол оқибатида аҳоли яшайдиган ҳудудларга ҳам тарқаб кетган. Ёнғин дастлаб 28 июль куни Манавгaтда бошланган ва мамлакатнинг Ўрта денгиз соҳиллари бўйлаб тарқалган.

Туркия қишлоқ ва ўрмон хўжалиги вазири Бекир Пакдемирлининг сўзларига қараганда, сўнгги 5 кунда жами 132 та ёнғин қайд этилган. Шулардан 125 таси назоратга олинган ва ўчиришга муваффақ бўлинган. Қолган ёнғинлар билан кураш ишлари давом эттирилмоқда.

Ёнғинларни ўчириш мақсадида 16 та самолёт, 9 та дрон, 51 та вертолёт, 850 та пуркагич ва 5 мингдан ортиқ ўт ўчириш хизмати ходимлари жалб этилган. Шунингдек, Россия ва Украинадан оғир вазнли самолётлар ҳам ёрдамга етиб келган. Европа Иттифоқи, Озарбайжон ҳам ўз ёрдамини таклиф қилган.

Дастлаб ўрмон ёнғинларига аномал иссиқ об-ҳаво сабаб бўлгани айтилган бўлса-да, кейинчалик Туркияда террорчи ташкилот дея тан олинган Курдистон ишчи партиясига алоқадор «Олов болалари» гуруҳи ёнғинлар учун жавобгарликни ўз зиммасига олган.

Таъкидланишича, «Олов болалари» 1990 йилдан бери мамлакатда мунтазам равишда ўрмон ёнғинларини келтириб чиқараётгани қайд этилган. Улар 2020 йилда ҳам худди шундай ҳаракатларни амалга оширгани маълум қилинган. Ўз навбатида, ҳозирда Анталиянинг Манавгат, Гундогуш ва Муғла, Мармарис, Кейсэгиз ва Милас туманларида ўрмон ёнғинларига қарши кураш давом этмоқда. Ёнғинларда ҳозиргача 8 киши ҳалок бўлган, 864 киши эса жароҳатланган. Муғладан 10 мингга яқин киши хавфсиз ҳудудларга эвакуация қилинган.

Ўт ўчирувчилар олов билан курашмоқда.

Аҳоли уйлари яқинида ёнаётган ўрмон.

Ёнғинлар кўплаб уйларни вайрон қилиб юборган.

Маҳаллий аҳоли ҳам оловни ўчиришда ўт ўчирувчиларга ёрдам бермоқда.

Ёнғин оқибатида вайрон бўлган аҳоли уйларидан бири.

Олов ёнишини кузатиб турган қиз.

Олов билан курашиб, чарчаб қолган ўт ўчириш хизмати ходимлари ўрмонда дам олмоқда.

Ёниб кетган ҳудуднинг юқоридан кўриниши.

Оловни ўчириш ишлари давом этмоқда.

Оймапинар яқинидаги ёнғин чегараси. Сунъий йўлдошдан олинган сурат.

Туркия президенти Ражаб Тоййиб Эрдўғон ва қишлиқ ва ўрмон хўжалиги вазири Бекир Пакдемирли самолётдан ўрмон ёнғинларининг кўламини кузатмоқда.

Ёнғиндан жабр кўрган қишлоқлик эркак хўрозига сув бермоқда. Ҳеч қандай олов инсонийликни олиб қўёлмайди.

Манавгатлик аёл ўрмон ёнғинларини кўзда ёш билан кузатмоқда.

Нафақат ўт ўчирувчилар, балки оддий аҳоли ҳам олов билан курашда жонбозлик кўрсатмоқда.

Олов ичидаги Анталья.