Қашқадарё вилояти Қарши шаҳрида севган йигити томонидан зўрлангани айтилган 2003 йилда туғилган Ж.Ш. исмли қиз кўп миқдорда дори истеъмол қилиб, жонига қасд қилишга уринди. Бу ҳақда «Nasafnews» хабар қилди.

Маълум бўлишича, Қарши шаҳар Қавали маҳалласида яшовчи қиз ярим тунда дори ичган. Унинг отаси эрталаб қизини ҳушсиз ҳолда кўрган ва шифохонага олиб борган. Шифокорлар томонидан кўрсатилган ёрдам туфайли қизнинг ҳаёти сақлаб қолинган.

Таъкидланишича, қизнинг яқинлари бундай ҳолат биринчи марта кузатилмаётгани, аввалроқ қиз ўзини осиб, жонига қасд қилишга уринганини айтган.

Қайд этилишича, қиз 2020 йил октябрь ойида 2002 йилда туғилган йигит Қ.Ш.нинг қариндошининг уйига боргани, у ерда йигит қизнинг номусига теккани, уйқу дори бериб мажбурлагани ва яланғоч ҳолатда суратга тушириб олганини айтган.

«Ўша куни бир аҳволда уйга қайтдим. Орадан вақтлар ўтгандан кейин йигит яна менга қўнғироқ қилди ва турли SMSларни ёзди. У телефонида менинг яланғоч суратларим борлигини, агар яна жинсий алоқа қилмасам, бу суратларни ота-онамга ва қариндошларимга кўрсатишини айтди. Расмларни ўзига қурол қилиб олди. Кейинчалик суратларимни тарқатиб юборишидан қўрқиб, у билан 2 ёки 3 марта жинсий алоқа қилишга мажбур бўлдим», — деган қиз мухбир билан суҳбатда.

Қизнинг қўшимча қилишича, йигит у билан ғайритабиий усуллар орқали жинсий алоқада бўлиб, турли жойларига жароҳат етказган.

Хабарга кўра, экспертиза ушбу ҳолатни рад этган. 2021 йил февраль ойида Қарши шаҳар ички ишлар бўлими тергов бўлинмаси томонидан жиноят иши қўзғатиш ҳам рад қилинган. Шундан кейин қизнинг ота-онаси турли ташкилотларга ҳолатни ўрганишни сўраб, мурожаат қилган.

Эслатиб ўтамиз, аввалроқ Тошкентда 15 ёшли қизни зўрлаган 3 нафар йигит ушлангани хабар қилинганди. Шунингдек, Қашқадарёда ўқувчи қиз уйида ўзини осиб қўйгани ва Хоразмда 19 ёшли келин ўзини осиб ўлдиргани маълум қилинган.