Америка Қўшма Штатлари Россия ва Шимолий Атлантика Иттифоқи ўртасида пайдо бўлган «кулранг зонани» олдини олиш учун Беларусь ва Украинани НАТОга аъзо давлатларга айлантиришни режалаштиргани айтилди. Бу ҳақда Беларусь ташқи ишлар вазири Владимир Макейга таяниб, «РИА Новости» хабар берди.

Маълум қилинишича, вазир бу маълумотни Беларусга ташриф буюрган АҚШ собиқ президентининг миллий хавфсизлик бўйича маслаҳатчиси Жон Болтоннинг баёнотига таяниб, айтган.

Таъкидланишича, Дональд Трампнинг миллий хавфсизлик бўйича маслаҳатчиси бўлиб ишлаган Болтон 2019 йил август ойида Беларусга ташриф буюрган. Минскда Беларус президенти Александр Лукашенко ва ташқи ишлар вазири билан музокаралар бўлиб ўтган. Болтон «бу жуда муҳим учрашув» эканини таъкидлаган.

Беларуснинг Ғарб давлатлари билан муносабатлари республикада 2020 йил август ойида бўлиб ўтган ва Лукашенко олтинчи марта ғалаба қозонган президент сайловларидан сўнг кескин ёмонлашган. Сайловдан сўнг, мамлакатда рухсатсиз оммавий норозилик намойишлари бошланган, улар тартибсизликларни келтириб чиқарган, ҳуқуқни муҳофаза қилиш органлари ходимлари эса махсус техника ва махсус воситалар ёрдамида намойишни бостирган. Беларусь ҳукумати норозилик акциялари чет элдан мувофиқлаштирилаётганини бир неча бор таъкидлаган.

Аввалроқ Лукашенко Беларусь чегарасининг ҳар бир метрини ёпишни буюргани хабар берилган. Шунингдек, Беларусь ироқлик муҳожирлардан «қурол» сифатида фойдаланаётгани айтилган.