Европа Иттифоқининг дипломатияси раҳбари Жозеф Боррель Иттифоқ «Толибон» ҳаракати Афғонистонда ғалаба қозонганини тан олгани ва Иттифоқнинг Афғонистондаги икки мақсадини маълум қилди. Бу ҳақда «РБК» хабар берди.

Боррелнинг сўзларига кўра, Европа Иттифоқи ким бўлишидан қатъий назар Кобулдаги расмийлар билан мулоқотни йўлга қўйиши керак.

«‘Толибонʼ ҳаракати урушда ғалаба қозонди, биз улар билан мулоқот қилишимиз керак бўлади», — деган у Европа Иттифоқи ташқи ишлар вазирларининг фавқулодда йиғилишидан кейинги матбуот анжуманида.

Таъкидланишича, Европа Иттифоқи «Толибон» ҳаракати билан 2001 йилда Ғарб давлатларига ҳарбий кампанияси давомида ёрдам берган Европа давлатлари фуқаролари ва афғонларнинг мамлакатдан олиб чиқилиши билан боғлиқ муаммоларни муҳокама қилиши керак. «Мен Афғонистонга амалий масалаларни ҳал қилиш учун ‘Толибонʼ ҳаракати билан музокара ўтказиш учун делегация юбораман», — деган Боррель.

Шунингдек, у Ғарбнинг Афғонистонда ҳарбий кампанияси бошланганидан буён «Толибон» ҳаракати ўзгарганми, деган саволга, у ҳозирча бу бўйича якуний хулоса чиқара олмаслигини айтган.

«‘Толибонʼ аввалгидек кўринишга эга, лекин инглиз тилида яхшироқ гапиради», — дея ҳазиллашган дипломат.

Боррель Толибон билан алоқа ўрнатишдан ташқари, Европа Иттифоқининг Афғонистондаги яна иккита мақсадини номлаган. Улардан биринчиси, ўз фуқароларини ва Ғарбга ёрдам берган афғонларни мамлакатдан олиб чиқиш. «Бизнинг биринчи вазифамиз — эвакуация қилиш ва биз билан 20 йилдан буён ишлаётган ва мамлакатни тарк этишни истаган афғон фуқаролари учун хавфсиз муҳит яратиш. Яна бир вазифа Афғонистондаги вазият туфайли янги миграцион инқироз пайдо бўлишининг олдини олиш», — деган Европа дипломатияси раҳбари.

Аввалроқ Европа Иттифоқи Афғонистоннинг қўшни давлатларига ёрдам бериши маълум қилинганди. Шунингдек, БМТ Aфғонистонга қўшни давлатларни чегараларни ёпмасликка чақиргани ҳақида хабар берилган.