Қозоғистон ташқи ишлар вазири ўринбосари Акан Раҳметуллин вазирликнинг Афғонистондаги вазият бўйича позицияси ҳақида маълумот берди. Бу ҳақда «Tengrinews» хабар берди.

Унинг сўзларига кўра, Афғонистон фуқароларининг ўзи давлат ва ижтимоий тузилишнинг энг мақбул моделини аниқлаши керак бўлади.

«Биз ‘Толибонʼ ҳаракатини тан олмадик. Хабарингиз бор, 19 август куни Қозоғистон Ташқи ишлар вазирлиги Афғонистондаги вазият бўйича расмий баёнот берди. Биз бу мамлакатдаги вазиятни диққат билан кузатишни давом эттирмоқдамиз, БМТ Хавфсизлик кенгашининг тезроқ ҳукумат тузиш, миллий озчиликлар ва аёлларнинг ҳуқуқларини ҳурмат қилиш, таҳдид солувчи гуруҳлар мавжуд бўлишининг олдини олиш зарурлиги ҳақидаги баёнотини қўллаб-қувватлаймиз. Бу қоидаларнинг бажарилиши Афғонистоннинг янги ҳукумати билан мулоқотни бошлаш шартига айланиши керак», — деган вазир ўринбосари онлайн брифингда.

Унинг айтишича, ҳозир ҳеч бир давлатни «Толибон» ҳаракатини тан олган ёки у билан дипломатик алоқалар ўрнатган, деб айтиб бўлмайди. Чунки айни пайтда ҳамма ҳаракатнинг амалга ошираётган ишлари баёнотларига қанчалик мос келишини ва у қанчалик музокара олиб бораётганини кузатмоқда.

Бундан ташқари, ташқи ишлар вазири ўринбосарининг таъкидлашича, «Толибон» ҳаракати Қозоғистоннинг Афғонистондаги элчихонасини қўриқлашга ваъда берган.

Аввалроқ Қозоғистон Афғонистондаги сўнгги воқеалар фонида чегарада хавфсизлик чораларини кучайтирганди. Шунингдек, мамлакат президенти «Толибон» ҳаракатининг Марказий Осиё учун энг катта хавфи нималигини айтган.