АОКАда 20 август, жума куни Молия вазирлиги мутасаддилари иштирокида бўлиб ўтган матбуот анжуманида Молия вазирлигига ички йўлларни таъмирлаш учун қанча таклиф келгани маълум қилинди. Бу ҳақда «Bugun.uz» мухбири хабар қилди.

Молия вазирлиги департамент директорининг қайд этишича, вазирлик томонидан ташкил этилган «Ташаббусли бюджет» лойиҳасига фуқаролардан жами 41 125 та таклиф келиб тушган.
«Таклифларнинг энг кўпи — 13 853 таси ички йўлларни таъмирлаш, 6798 та таклиф умумтаълим мактабларини таъмирлаш ва жиҳозлаш, 5649 та таклиф кўчаларни ёритиш тизими, 4424 та таклиф ичимлик суви таъминотини яхшилаш билан боғлиқ муаммолар ҳисобланади», — деди Шерзод Муҳамедов.

Таъкидланишича, ташаббусли бюджет жараёнининг 3-босқичи, яъни овоз бериш жараёни ўтказилмоқда. Ҳар бир шахс фақатгина бир маротаба овоз бериш хуқуқига эга бўлади.

«Бугунги кунга келиб фуқаролар томонидан 100 мингдан ортиқ овозлар берилди. Бу бўйича энг юқори кўрсаткич Фарғона вилоятига (20 446) тўғри келса, энг паст кўрсаткич Сирдарё вилоятига (1962) тўғри келмоқда», — деди департамент директори.

Аввалроқ Молия вазирлиги ҳузурида янги жамғарма ташкил этилиши ва вазирлик Қашқадарёда «эшак» деб ҳақоратланган ходим ишига муносабат билдиргани маълум қилинганди.