Ўзбекистонда 20 август Тадбиркорлар куни деб эълон қилинди
Ўзбекистонда 20 август Тадбиркорлар куни этиб белгиланди. Бу ҳақда Президент тадбиркорлар билан ўтган очиқ мулоқотда айтиб ўтди.
Маълум бўлишича, Шавкат Мирзиёев 20 августда тадбиркорлар билан учрашиб, бу каби тадбирни ҳар йили ташкил этиш истагини билдирган.
«Бугунги санани, яъни 20 августни мамлакатимизда Тадбиркорлар куни деб эълон қилиб, уни ҳар йили юртимизда кенг нишонласак, бу ташаббусга нима дейсизлар?», — дея таклиф берган Шавкат Мирзиёев.
Таъкидланишича, тадбиркорлар бу таклифни қўллаб-қувватлаган. Ҳар йили 20 август куни Президентнинг бизнес вакиллари билан очиқ мулоқоти ўтказилади. Бу кунда энг илғор бизнес вакиллари давлат мукофотлари билан ҳам тақдирланади.
Эслатиб ўтамиз, аввалроқ Шавкат Мирзиёев тадбиркорларнинг ерга эгалик қилишдаги муаммолари ҳақида гапиргани хабар қилинганди. Шунингдек, Шавкат Мирзиёев темир йўл монополияси ҳақида фикр билдиргани ва Президент «Ўзбекистон темир йўллари» раҳбарини огоҳлантиргани маълум қилинган.
