Қозоғистонда 30 йилдан буён шифокор бўлиб ишлаган невролог Эмилия Гречаник қозоқ миллатчилари уни рус тилидан фойдалангани учун кечирим сўрашга мажбурлаганини маълум қилди. Бу ҳақда «Известия» хабар берди.

Гречаникнинг айтишича, иш вақтида унга қўнғироқ бўлган ва у суҳбат чоғида қўнғироқ қилган одамдан рус тилида идентификация рақамини беришини сўраган.

«Бунинг учун менга русча гапиришга ҳаққим йўқлигини, Қозоғистон фуқароси эканимни ва шунга ўхшаш нарсалар айтишди. Давлат тили — қозоқ, миллатлараро мулоқот тили — рус тили. Биз икки тилда ишлаймиз. Мен фақат рус тилида рақам сўрагандим холос», — деган невролог.

Маълум бўлишича, шифокорнинг телефон суҳбати ёзиб олинган. Блогер Куат Ахметов суҳбатнинг видеолавҳасини эълон қилган ва невролог кўпчилик олдида кечирим сўрамаса, материалларни прокуратурага юборишини ваъда қилган. Натижада Гречаник узр сўраган видеони ёзиб қолдирган.

«Мен камера қаршисида ўтириб кечирим сўрашга қарор қилмаганман. Ростини айтсам, мажбур бўлдим. Ахметов менга кечирим сўрашим кераклигини айтди. Мен унга: ‘Хўш, айтайлик, агар хоҳласангиз, мен рус тилида кечирим сўрайман, дедим. ‘Йўқ, сиз қозоқ тилида кечирим сўрайсиз’», — дея Гречаник блоггернинг сўзларини иқтибос келтирган.

Аввалроқ Қозоғистонда фуқароларнинг қозоқ тилида гаплашаётгани ёки йўқлигини текшириш учун рейд ўтказилгани айтилганди. Шунингдек, Қозоғистонда карантин қоидаларидан бирини бузган амалдор ишдан бўшатилганди.