«Толибон» ҳаракати Американинг бир нечта самолётлари, ҳарбий вертолётлари ва танкка қарши ракеталарини қўлга киритди. Бу ҳақда «Al-Arabiya»га таяниб, «РИА Новости» хабар берди.

Маълум қилинишича, ҳаракатнинг қурол-яроғга эга бўлиши Пентагонда хавотир уйғотган. Манбаларга кўра, толиблар қўлга киритган қуролларни йўқ қилиш тўғрисида ҳали қарор қабул қилинмаган.

«‘Толибонʼ ҳаракатига вертолёт ва самолётлардан фойдаланиш қийин бўлиши мумкин, чунки учувчилар йўқ, техник хизмат кўрсатиш ҳам мавжуд эмас», дейилган хабарда.

Таъкидланишича, Америка Қўшма Штатлари ҳарбий омборларга зарба бериш тўғрисида қарор қабул қилиш учун эвакуация жараёнининг тугашини кутмоқда.

Аввалроқ Афғонистонлик ҳарбий «Толибон» ҳаракати жангда қандай қурол ишлатганини айтиб берганди. Шунингдек, «Толибон» ҳаракатининг қаердан даромад олаётгани маълум бўлганди.