Жиззахда эр қайнатасининг уйида хотинини пичоқлади — видео
Жиззах вилояти Зарбдор туманида эр ўз аёлини пичоқлаб қўйди. Бу ҳақда вилоят Ички ишлар бошқармаси ахборот хизмати хабар қилди.
Маълум бўлишича, Зарбдор тумани Ёшлик маҳалласида яшовчи аёл эри билан жанжаллашиб, эмизикли фарзандини олиб, Оқар маҳалласидаги ота-онасининг уйига кетиб қолган. Икки кун ўтгач, тунги соат 00:00 атрофида эр қайнатасиникига бориб, аёли билан гаплашиб олиши кераклигини айтган, ота-она рози бўлиб, уларни ёлғиз қолдирган. Бир вақт қўшни хонадан қизининг чинқириғини эшитган ота уларнинг олдига кирганида қонга беланган қизини кўрган. Унинг олдида фарзанди бўлган, эр эса унинг бўйин ва елка қисмларига пичоқ уриб, ўзи деразадан қочиб кетган.
Қайд этилишича, аёл жароҳат оқибатида шифохонага ётқизилган, ҳолати барқарор. Эркак эса ички ишлар бўлимига бориб, ўз айбига иқрор бўлган ва пичоқни ўз уйидан олиб келганини айтган.
Таъкидланишича, ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.
Эслатиб ўтамиз, аввалроқ Россияда ўзбекистонлик эркак хотинини 26 марта пичоқлаб ўлдиргани хабар қилинганди. Шунингдек, Наманганда эркак синфдошининг тўйида собиқ хотинини пичоқлаб қўйгани ва Наманганда 41 ёшли эркак рашк сабабли хотинини пичоқлаб ўлдиргани маълум қилинган.
