Навоий вилояти Хатирчи туманида 20 август куни фермер ногирон аёлни участка нозирларига урдиргани ҳақида хабар тарқалганди. Вилоят прокуратураси ахборот хизмати ҳолатга муносабат билдирди.

Маълум бўлишича, фуқаролик ишлари бўйича Хатирчи туман судининг «Н.Ч.Б.» фермер хўжалигига тегишли бўлган контурдаги ерни фуқаро Т.Т. томонидан ўзбошимчалик билан эгаллаб олинган 1 гектар токзор ер майдонидан мажбурий тартибда чиқариш бўйича қарори ижрога қўйилган.

Шунингдек, 2 июль куни Хатирчи тумани Учқора маҳалласи ҳудудида фермер хўжалиги раиси Ч.Н. фуқаро М.Т. билан жанжаллашиб, бир-бирини камситувчи сўзлар билан ҳақорат қилган ва тан жароҳати етказган.

Таъкидланишича, ҳолат юзасидан терговга қадар текшириш ҳаракатлари ўтказилиб, тўпланган ҳужжатлар бўйича жарима жазоси тайинланган.

Бундан ташқари, 20 август куни ферма раиси Ч.Н. ер майдонидаги узум маҳсулотларини йиғиштириш учун борганида фуқаро Т.Т.нинг турмуш ўртоғи М.Т. ва унинг ўғли У.Т. фермерга тегишли узум маҳсулотларини йиғиб, хирмонга ёйиб қўйганини кўрган ва профилактика инспекторига қўнғироқ қилиб, жанжал бўлиши мумкинлиги ҳақида огоҳлантирган.

Қайд этилишича, ИИБ ходимлари хирмондаги маҳсулотларга далолатнома расмийлаштираётган вақтида фуқаро М.Т. қўлига таёқ кўтариб, фермер хўжалиги раисини урмоқчи бўлган. Профилактика инспектори уни қайтариб қолиш учун қўлидан ушлаб, таёғини олиб қўйгани аниқланган.

Таъкидланишича, ҳозирда ИИБ ходимларининг хатти-ҳаракатларига қонуний баҳо бериш мақсадида Хатирчи туман прокуратураси томонидан терговга қадар текшириш ҳаракатлари олиб борилмоқда.

Эслатиб ўтамиз, аввалроқ Тошкентда ИИБ ходими 43 ёшли аёлга куч ишлатиб, қўпол муносабатда бўлгани хабар қилинганди. Шунингдек, Фарғонада собиқ ИИБ ходими тез ёрдам шифокорини калтаклагани ҳақидаги хабарга изоҳ берилгани ва Наманганда ИИБ ходимлари фуқарони куч ишлатиб олиб кетгани маълум қилинган.