Япония II жаҳон урушида СССРга қарши бактериологик қурол ишлатмоқчи бўлгани маълум қилинди
Япония Иккинчи жаҳон уруши пайтида СССРга қарши бактериологик қурол ишлатмоқчи бўлгани маълум қилинди. Бу ҳақда Россия Федерал хавфсизлик хизмати ҳужжатларига таяниб, «РИА Новости» хабар берди.
Маълум қилинишича, Япония 1945 йил июнь ойида СССРга қарши бактериологик уруш бошлашга тайёргарлик кўраётган бўлган. Ҳужжатлар орасида 731-Квантунг армияси махсус отрядининг собиқ ходими, бактериологик қуроллар ишлаб чиқариш билан шуғулланган Като Цунэнорининг гувоҳлиги бор.
Унинг сўзларига кўра, Японияда СССРга, шу билан бирга, АҚШ ва Хитойга қарши вабо микробларидан фойдаланиш режаси бўлган. «Шунингдек, куйдирги таёқчасини ишлатишга тайёргарлик кўрилаётганини эшитгандим», — деган Цунэнори.
Аввалроқ Иккинчи жаҳон уруши пайтида Япония махсус хизматлари қийноқ остида ҳарбий асирларни СССРга қарши ишлашга мажбурлай олмагани, шундан сўнг уларни 1945 йилда генерал-лейтенант Широ Ишии бошчилигидаги 731-Квантунг армиясининг махсус отрядига юборгани, у ерда совет фуқароларида бактериологик қурол синовдан ўтказилгани айтилган. Шунингдек, Россия Федерал хавфсизлик хизмати Иккинчи жаҳон урушига оид махфий ҳужжатлардан бирини очиқлаган.
