Қирғизистоннинг атиги 32 фоиз аҳолиси мамлакатнинг амалдаги президенти Садир Жапаровга ишониши маълум қилинди. Бу ҳақда Center for Insights in Survey Research халқаро республика институти буюртмаси бўйича ўтказилган «SIAR Research and Consulting» тадқиқотига таяниб, «24.kg» хабар берди.

Маълум қилинишича, сўровда Қирғизистоннинг барча вилоятидан, шунингдек, Бишкек ва Ўш шаҳридан келган 18 ёшдан катта 1211 нафар Қирғизистон фуқароси иштирок этган. Қайси сиёсатчи ёки жамоат арбобларига кўпроқ ишонасиз, деган саволга 24 фоиз фуқаро Қамчибек Ташиевни айтган. Қолган сиёсатчилар ҳатто 10 фоизни ҳам қўлга киритмаган.

Собиқ президент Алмазбек Атамбоев атиги 2 фоиз, Сўронбой Жээнбеков ва Асқар Акаев 1 фоиздан олган. Респондентларнинг ҳеч бири Роза Отунбаеванинг исмини айтмаган. Шу билан бирга, сўровнома иштирокчиларининг 20 фоизи ҳеч кимга ишонмаслигини таъкидлаган.

Аввалроқ Қирғизистон президенти жонли эфирда маданият вазирига танбеҳ бергани ҳақида хабар берилганди. Шунингдек, Қирғизистон президентининг Марказий Осиё–БМТ саммитини ўтказиш таклифи маълум қилинган.