Россиядан Ўзбекистонга қурол ҳамда ҳарбий техника етказиб берилади
Россия «АрМИ–2021» халқаро ҳарбий техника форумида Ўзбекистон билан шартнома имзолади. Бу ҳақда Россия ҳарбий-техник ҳамкорлик федерал хизмати директори Дмитрий Шугаевга таяниб, «ТАСС» хабар берди.
Таъкидланишича, қурол ҳамда ҳарбий техника етказиб бериш бўйича шартнома нафақат Ўзбекистон, балки Хитой, Ҳиндистон ва бошқа бир қатор давлатлар билан ҳам имзоланган.
«Якун қуйидагича: ‘АрМИ–2021’ форумида Хитой билан денгиз масалалари бўйича, Ҳиндистон билан қуруқлик масалалари бўйича, шунингдек, Ўзбекистон, Арманистон, Мьянма, Беларусь билан шартнома тузилди», — дея таъкидланган хабарда.
Қайд этилишича, хорижий давлатлар билан тузилган шартномаларнинг умумий қиймати 2 миллиард доллардан ошган.
Аввалроқ «АрМИ–2021» Халқаро армия ўйинларининг «Танк биатлони» мусобақасида Ўзбекистон жамоаси учинчи ўриннни эгаллагани хабар қилинган. Шунингдек, Фарғонада Халқаро армия ўйинларининг «Йўл патрули» мусобақасига старт берилгани маълум қилинган.
