Туркманистонда Мурғоб дарёсининг саёз бўлиб қолиши Ҳиндукуш гидроэлектр станциясининг сувсиз қолишига сабаб бўлди. Бу ҳақда «Метеожурнал» хабар берди.

Маълум қилинишича, дарё суви шунчалик камки, у ҳатто тўғон дарвозаси орқали узлуксиз оқим ҳосил қилмайди. Аввал Мурғоб дарёси етарли ҳажмдаги сувга эга бўлган. Аммо баъзи йилларда кучли сув етишмаслиги кузатилган.

Таъкидланишича, ҳозирги сув етишмаслигига мамлакатда кузатилган кучли қурғоқчилик сабаб бўлган. Жумладан, ёғингарчилик меъёрдан пастлаган, ҳарорат эса юқорилаган. Амударёда эса сув оқими кўпайган. Охирги марта шунга ўхшаш оқим миқдори 2019 йилнинг ёзида қайд этилган. Музликларнинг фаол эриши оқимнинг кўпайишига сабаб бўлгани айтилган. Шу сабаб Амударёда сувнинг кўпайиши ёзги мавсумга тўғри келади.

Қайд этилишича, дарё оқимининг кўпайишига қарамай, унинг қуйи қисмида сув танқислиги кескинлашиб бормоқда. Август ойининг биринчи ўн кунлигида Дашовуз вилоятида дефицит 120 миллион кубометр сувга ёки сув олиш чегарасининг 40 фоизига етган. Ўн йил олдин бу кўрсаткич 38 фоиз, ундан олдин эса 35 фоиз бўлган. Амударёнинг қуйи оқимида сув танқислиги 365 миллион кубометр сувни ташкил қилади.

Аввалроқ Яқин Шарқдаги энг катта кўл бутунлай йўқ бўлиб кетиши мумкинлиги айтилганди. Шунингдек, Боливиядаги кўл бутунлай қуриб қолганди.