АҚШ президенти Жо Байден «Исломий давлат» таркибига кирувчи ва Кобул аэропортида портлашларни уюштиришда айбланаётган «Вилоят Хуросон» террорчилик гуруҳи раҳбарлари ва нишонларига авиазарбалар тайёрлашни буюрди. Бу ҳақда «Telegraph» хабар берди.

Байденнинг сўзларига кўра, ҳужумда айбдорлар топилади ва жазоланади.

«Биз ўз қўмондонлигимизга ИШИД активлари, раҳбарияти ва объектларига зарба бериш бўйича оператив режалар ишлаб чиқишни буюрдик. Биз ўзимиз танлаган вақт ва жойда қатъий ва аниқ жавоб зарбаси берамиз», — деган Байден.

Шу билан бирга, давлат раҳбари Афғонистонда содир бўлаётган барча воқеалар учун жавобгарлигини тан олишини айтган.

Маълумот учун, Кобул аэропорти яқинида 26 август куни иккита портлаш содир бўлди, улардан бири чет элликлар, шу жумладан, Британия ва АҚШ фуқаролари йиғилган «Барон» меҳмонхонаси яқинида содир бўлган. Биринчи портлаш худкуш террорчи томонидан амалга оширилган, бомба ўрнатилган машина портлатилган.

Афғонистон Соғлиқни сақлаш вазирлиги маълумотларига кўра, ҳужум оқибатида камида 90 киши ҳалок бўлган, 150 дан ортиқ одам жароҳатланган. Сўнгги маълумотларда 100 дан ортиқ одам ҳалоқ бўлгани маълум қилинган. Пентагон маълумотларига кўра, 15 нафар америкалик аскар ҳалок бўлган, яна 12 нафари яраланган.

Аввалроқ дунёдаги 4 та давлат Кобул аэропортида террорчилик содир бўлишидан огоҳлантирганди. Шунингдек, АҚШ разведкаси Кобул аэропортидан ташқаридаги америкаликларни яширинча эвакуация қилаётгани маълум бўлганди.