Ҳинд олимлари 2021 йил октябргача ўсмирларни коронавирусга қарши эмлаш учун дори ишлаб чиқариши айтилди. Бу ҳақда Ҳиндистон соғлиқни сақлаш вазири ўринбосари Раджеш Бҳушанга таяниб, «РИА Новости» хабар берди.

Маълум бўлишича, препарат «ZyCov-D» деб номланган. Айтилишича, бу коронавирус генетик материалининг бир қисми ёрдамида яратилган дунёдаги биринчи вакцина ҳисобланади. Қайд этилишича, вакцинани ишлаб чиқарувчи «Zydus Cadila» компанияси дорини 12 ёшдан ошган барча фуқароларни эмлаш учун ишлатишга рухсат олган.

Мамлакатдаги коронавирус ва иммунитет бўйича маслаҳат гуруҳи мутахассислари ҳам болалар учун эмлаш бўйича тавсиялар тайёрламоқда. «Биз улар билан музокара олиб бормоқдамиз ва сотиб олиш шартларини аниқлагандан сўнг уларни сиз билан бўлишамиз», — деган вазир ўринбосари.

Аввалроқ Ҳиндистонда 20 нафар беморга адашиб 2 хил вакцина қўлланганди. Шунингдек, мамлакатда коронавирусдан тузалган беморларда хавфли касаллик аниқланган.