ИШИД террорчилик ташкилоти Афғонистон пойтахти аэропорти яқинида ҳужум уюштирган худкушнинг исмини айтди. Бу ҳақда «Спутник Афғонистон» хабар берди.

Маълум бўлишича, худкуш террорчи Абдул-Раҳмон Логари бўлган. Қайд этилишича, у Кобул аэропортининг чеккасидаги барча назорат-ўтказиш пунктларидан ўтиб, беш метргача масофада америкалик ҳарбийларга яқинлашган. Қайд этилишича, Кобулдаги портлашлар оқибатида қурбонлар сони 170 кишига етган. Воқеа натижасида 200 киши жароҳатланган.

Афғонистон пойтахтида 26 август куни камида олтита портлаш содир бўлган. Кобул аэропортига кириш жойи яқинида биринчи теракт худкуш томонидан содир этилган. «ИШИД» гуруҳининг Марказий Осиё бўлими бўлган «Вилоят Хуросон» ҳужумлар учун жавобгарликни ўз зиммасига олган.

Аввалроқ Кобулда содир бўлган теракт тафсилотлари маълум қилинганди. Шунингдек, Байден мазкур воқеалардан кейин ИШИДга қарши авиазарба беришни буюрган. Бундан ташқари, «Толибон» ҳаракати Кобул аэропортида ИШИДнинг 3 нафар террорчисини қўлга олгани айтилган.