Ўзбекистонда энг кенг тарқалган коронавирус штамми «дельта» экани аниқланди. Бу ҳақда Инновацион ривожланиш вазирлиги ахборот хизмати хабар қилди.

Маълум бўлишича, Илғор технологиялар маркази Ўзбекистонда аниқланган коронавирус инфекцияси ҳолатларини ўрганиш натижаларини эълон қилган. Илмий тадқиқотлар натижаларига кўра, «дельта» штаммининг улуши 82 фоизни ташкил этган, бу бутун кузатувлар тарихидаги энг юқори кўрсаткич ҳисобланади. Иккинчи ва учинчи ўринларни «альфа» (10,3 фоиз) ва «20А» (7,7 фоиз) штаммлари эгаллаган.

Таъкидланишича, Илғор технологиялар маркази директори Шаҳлохон Турдиқулова эълон қилинган маълумотларга қуйидагича изоҳ берган:

«Сўнгги ҳафталарда коронавируснинг «дельта» варианти умумий касалланишлар сонининг бешдан тўрт қисмигача ошди. «Ҳинд штамми» деб номланувчи вирус тури «Ухан» ва «Британия» версияларига қараганда кўпинча касалликнинг оғир шаклларига олиб келиши билан хавотирга солади».

Эслатиб ўтамиз, аввалроқ Жаҳон соғлиқни сақлаш ташкилоти вакили коронавируснинг «дельта» штаммига қарши курашиш йўлини айтгани хабар қилинганди. Шунингдек, олимлар коронавируснинг «дельта» штаммига қарши энг самарали вакцинани аниқлагани ва коронавируснинг «дельта» штамми қайси ўта юқумли касалликка ўхшаши айтилгани маълум қилинган.