Қирғизистоннинг 17 фоиз аҳолиси мамлакатнинг Ўзбекистон билан муносабатларини яхши деб баҳолади. Бу ҳақда Center for Insights in Survey Research халқаро институти буюртмаси бўйича ўтказилган «SIAR Research and Consulting» тадқиқотига таяниб, «24.kg» хабар берди.

Маълум қилинишича, респондентларнинг яна 60 фоизи муносабатларни қайсидир маънода яхши эканига ишонч билдирган, фақат 3 фоизи алоқаларни ёмон деб баҳолаган. Ўз навбатида, қирғизистонликлар мамлакатнинг бошқа давлатлар билан муносабатига ҳам баҳо берган. Жумладан, уларнинг 55 фоизи Тожикистон билан муносабатларнинг ёмонлигини айтган. Ҳамда 51 фоиз овоз Қирғизистон ҳукумати бу мамлакат билан ўзаро алоқаларни давом эттираётганидан мамнун эмаслигини билдирган. Респондентларнинг фақат 1 фоизи икки томонлама алоқа яхши ривожланаётганига умид билдирган.

Шунингдек, 40 фоизи респондент Россия билан муносабатларни жуда яхши деб баҳолаган, 52 фоизи муносабатларнинг қайсидир маънода яхши эканига ишонган, фақат 5 фоизи ёмон деб ҳисобалаган. Тадқиқотда Қирғизистон аҳолиси Туркия, Қозоғистон, Европа Иттифоқи, Хитой, Япония, АҚШ, Канада билан алоқаларга ҳам баҳо берган.

Аввалроқ Қирғизистон президентига мамлакат аҳолисининг неча фоизи ишониши маълум қилинганди. Шунингдек, Қирғизистон президентининг Марказий Осиё–БМТ саммитини ўтказиш таклифи ҳақида хабар берилганди.