Янгиликлар - 20:48 · 27.08.2021

Туркия Грецияга уруш билан таҳдид қилгани айтилди

Туркия халқаро денгиз ҳуқуқини бузган ҳолда Грецияга уруш билан таҳдид қилгани айтилди. Бу ҳақда «ТАСС» хабар берди.

Фото: «Shutterstock»

Маълум бўлишича, бу гапни Греция ташқи ишлар вазири Никос Дендиас АҚШ Сенати Ташқи ишлар қўмитаси раиси Роберт Менендес билан учрашувдан сўнг айтиб ўтган. Вазирнинг сўзларига кўра, агар Афина ҳудудий сувларини Эгей денгизидаги 6 денгиз милидан 12 денгиз милигача кенгайтирса Туркия Греция оролларининг суверенитетига таҳдид қилади.

Греция вазирининг баёноти мамлакат Ташқи ишлар вазирлиги матбуот хизмати томонидан тарқатилган. «Туркия ҳар куни ҳеч қандай эътирозга ўрин йўқ жойда Греция оролларининг суверенитетига қарши чиқади. Улар барча қонун нормаларини бузган ҳолда, агар Греция оролларнинг ҳудудий сувларини кенгайтиришдек ажралмас ҳуқуқидан фойдаланса, уруш қилиши билан таҳдид қилади», — деган Дендиас.

Дендиаснинг фикрича, АҚШ, Греция ва бошқа давлатларнинг устувор вазифаларидан бири ўз минтақасида беқарорликка ҳисса қўшадиган мамлакатларга қурол-яроғнинг илғор тизимини экспорт қилишни тақиқлаш бўлиши керак.

Аввалроқ Туркия Грецияга қарши шикоят билан Бирлашган Миллатлар Ташкилотига мурожаат қилганди. Шунингдек, Туркия расмийлари Грециянинг Афина меморандуми шартларини бажармаганига жавобан Эгей денгизининг халқаро қисмини ҳарбий машқлар зонаси деб эълон қилган.