АҚШнинг Афғонистондаги ҳаво ҳужумида ИШИДнинг 2 раҳбари йўқ қилинди
АҚШнинг Афғонистонга уюштирган ҳаво ҳужуми натижасида ИШИДнинг икки етакчиси йўқ қилинди. Бу ҳақда «Известия» хабар берди.
Маълум бўлишича, ушбу хабарни генерал-майор Уилям Тейлор 28 август куни Пентагонда бўлиб ўтган брифингда маълум қилган. «Мен тасдиқлай оламанки, янги маълумотларга кўра, ИШИДнинг юқори мартабали иккита вакили ўлдирилган ва биттаси яраланган», — деган у.
Пентагон матбуот котиби Жон Кирби эса АҚШ Афғонистондаги хавфсизлик таҳдидлари билан боғлиқ вазиятни доимий кузатиб бораётганини таъкидлаган. Айтилишича, Вашингтон бўлиб ўтган воқеалардан кейин ҳам 31 августгача чекиниш операциясини якунлаш қароридан қайтмаган. 28 август ҳолатига кўра, Кобулдан АҚШнинг 5,4 минг нафар фуқароси эвакуация қилинган. Шу билан бирга, 117 минг афғонистонлик ҳам мамлакатдан олиб чиқилган.
Маълумот учун, ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Аввалроқ АҚШ Афғонистондаги ИШИД ҳаракати жангариларига қарши махсус операция ўтказгани хабар қилинганди. Шунингдек, «Толибон» ҳаракати Кобул аэропортида ИШИДнинг 3 нафар террорчисини қўлга олгани айтилган.
