Ҳукумат 27 август куни «Минимал истеъмол харажатлари қийматини ҳисоблаш тартибини амалиётга жорий этиш тўғрисида»ги қарорни қабул қилди. Бу ҳақда Адлия вазирлигининг Telegram’даги «Huquqiy axborot» канали хабар берди.

Қарорга кўра, минимал истеъмол харажатлари кўрсаткичидан камбағаллик мезони (ёки чегараси) сифатида фойдаланилади. 2022 йилдан бошлаб «Ижтимоий ҳимоя ягона реестри» ахборот тизими орқали оилани кам таъминланган деб эътироф этиш жараёнида қўлланиладиган ва жон бошига тўғри келадиган бир ойлик даромад мезони минимал истеъмол харажатларига тенглаштирилади.

Маълум қилинишича, ҳар йили август ойигача минимал истеъмол харажатлари қийматининг прогноз параметрлари инфляция кутилмаларидан келиб чиқиб ҳисобланади. Минимал истеъмол харажатлари ва камбағаллик даражаси ҳар йилги ҳисобот йилида инфляция даражасидан келиб чиқиб, кейинги йилнинг 20 январига қадар эълон қилиб борилади.

Шунингдек, минимал истеъмол харажатлари таркиби камида ҳар 5 йилда қайта кўриб чиқилади. Қарор билан «Аҳолининг минимал истеъмол харажатлари қиймати ва камбағаллик чегарасини ҳисоблаш тартиби тўғрисида»ги низом тасдиқланди.

Аввалроқ Ўзбекистонда аҳолининг минимал истеъмол харажатлари миқдори эълон қилингани, минимал истеъмол харажатларининг давлат буджетига таъсири маълум қилингани ва камбағаллик чегарасини белгиловчи сумма жорий этилиши хабар қилинган.