Тошкент метросида поезд яна тўхтаб қолди — видео
Тошкент метрополитенининг поезди Ойбек бекатидан Тошкент бекатига қараб ҳаракатланаётганда тўхтаб қолди. Бу ҳақда «Тошкент метрополитени» ахборот хизмати хабар берди.
Маълум бўлишича, воқеа соат 14:35 атрофида Ойбек бекати ва Тошкент бекати оралиғида содир бўлган. Аниқланишича, электропоезд машинисти ҳаракат таркибида носозликни сезиб, тегишли йўриқномага асосан ҳаракат хавфсизлигини таъминлаш мақсадида электропоездни тўхтатган.
Йўриқномага асосан ортидан келган ҳаракат таркиби йўловчиларни Ойбек бекатида тушурилиб, ёрдам тариқасида юборилган. Носоз ҳаракат таркиби йўловчилари Тошкент бекатига тушурилиб, техник кўрикка юборилган. Шунингдек, ҳолатни бартараф этиш вақти 9 дақиқани ташкил этган.
Аввалроқ Тошкент метрополитенининг Ҳамид Олимжон бекатида поезд тўхтаб қолгани хабар қилинган. Шунингдек, Тошкент метрополитенининг Космонавтлар бекатида поезд бир неча дақиқа тўхтаб қолгани бўйича «Ўзбекистон темир йўллари» «Bugun.uz»га изоҳ берган.
