Афғонистон пойтахти Кобулда 29 август, якшанба куни кучли портлаш содир бўлгани хабар қилинганди. Мазкур авиазарба АҚШ томонидан амалга оширилгани маълум қилинди. Бу ҳақда «Reuters»га таяниб, «РИА Новости» хабар берди.

Маълум қилинишича, портлашга Кобул аэропорти яқинидаги уйга келиб тушган ракета сабаб бўлган. Ҳужум оқибатида аёл ва бир нафар бола ҳалок бўлган. Таъкидланишича, зарба мақсади «ИШИД-Хуросон» гуруҳи жангариларини йўқ қилиш бўлган.

Сўнгги маълумотларга кўра, мазур авиазарбада «ИШИД-Хуросон» террорчиси йўқ қилинган. У яна бир терактга тайёргарлик кўраётган бўлган. Аммо мазкур хабар расман тасдиқланмаган.

Маълумот учун, Афғонистон пойтахтида 26 август куни камида олтита портлаш содир бўлган. Кобул аэропортига кириш жойи яқинида биринчи теракт худкуш томонидан содир этилган. ИШИД гуруҳининг Марказий Осиёдаги бўлими ҳисобланувчи «Вилояти Хуросон» ҳужумлар учун жавобгарликни ўз зиммасига олган.

Аввалроқ Кобулда содир бўлган теракт тафсилотлари маълум қилинганди. Шунингдек, Байден мазкур воқеалардан кейин ИШИДга қарши авиазарба беришни буюрган. Бундан ташқари, «Толибон» ҳаракати Кобул аэропортида ИШИДнинг 3 нафар террорчисини қўлга олгани айтилган. Ҳамда Байден Кобул аэропортида янги теракт содир бўлишидан огоҳлантирган.