Сирдарё вилояти Гулистон туманида эркак ички ишлар ходимини темир қозиқ билан уриб, жароҳатлади. Бу ҳақда Ички ишлар вазирлиги ахборот хизмати хабар қилди.

Маълум бўлишича, Гулистон туман Олтин водий маҳалласида профилактика инспектори фуқароларнинг карантин талабларига риоя этишини назорат қилиб, Х.Ч. исмли эркакдан тиббий ниқоб тақишни талаб қилган. Эркак ходимнинг қонуний талабига бўйсунмай, фаол қаршилик кўрсатган ва ходимни ҳақоратлаган.

Қайд этилишича, фуқаро наркология кўригидан ўтказилганда маст ҳолатда экани аниқланган. Х.Ч. Маъмурий жавобгарлик тўғрисидаги кодекснинг 194-моддаси (Ички ишлар органлари ходимининг қонуний талабларини бажармаслик), 183-моддаси (Майда безорилик) ва 54-моддаси (Эпидемияларга қарши кураш қоидаларини бузиш) 1-қисми билан жавобгарликка тортилган.

Таъкидланишича, Х.Ч. бир неча бор суд чақирувига бормаган ва инспектордан 100 минг сўм сўраган. Ходим унинг уйига борганда фуқаро болта, болға ва қозиқ билан ташланиб, ўлдириш билан қўрқитган. Бундан ташқари, Х.Ч. ходимнинг машинаси олд ойнасини синдириб ташлаган.

Хабар берилишича, унга нисбатан 10 сутка қамоқ жазоси тайинланган.

Эслатиб ўтамиз, аввалроқ Тошкентда эркак Миллий гвардия ходимига шиша бўлаги билан жароҳат етказгани хабар қилинганди. Шунингдек, Сурхондарёда бир гуруҳ йигитлар 2 нафар ички ишлар ходимини ургани ва Фарғонада хотинининг машинасини маст ҳолда бошқарганликда айбланган эркак йўл-патруль хизмати ходимини калтаклагани маълум қилган.