Сурхондарё вилояти Денов туманида 29 август куни ички ишлар ходимлари фуқароларни зўрлик билан куч ишлатиб олиб кетгани ҳақида хабар тарқалганди. Ички ишлар вазири матбуот котиби ҳолат бўйича «Bugun.uz»га маълумот берди.

Унда айтилишича, Денов тумани Мустақиллик кўчасида 29 август куни жамоат тартибини сақлаш хизматига жалб этилган профилактика инспектори лейтенант Зафар Бакиров ўзини Зафар Каримов деб таништирган фуқаро кўчада ўзига тегишли бўлган шахсий «Lada» автомашинаси билан пиёдалар ўтиш йўлагини тўсиб қўйгани учун унга транспорт воситасини олиш талабини қўйган. Фуқаро унга фаол қаршилик кўрсатган ва шу ерда турган фуқароларни ўзига жалб қилиб, профилактика инспекторининг қонуний талабларини бажармаган.

Таъкидланишича, шу орада яқин атрофда хизмат олиб бораётган профилактика инспектори катта лейтенант Шерзод Тўраев воқеа жойига етиб келиб, фуқарога «жамоат жойда фуқароларни ўзингизга қаратманг, биз билан ички ишлар бўлимига юринг, ўша ерда гаплашамиз», деб айтганидан сўнг фуқаро Каримов ходимларга фаол қаршилик қўрсатиб, ҳеч қаерга бормаслигини айтган. Хизматчилар фуқарони ички ишлар бўлимига олиб келиш мақсадида автомашинага миндирмоқчи бўлган вақтда кейинчалик ўзини Чориев Абдулазиз ва Ибрагимов Фаррух деб таништирган фуқаролар ҳам эркакни олиб кетмаслик учун ходимларга фаол қаршилик кўрсатган. Шундан сўнг ёрдамчи кучлар кўмагида уч нафар қоидабузар туман ички ишлар бўлими биносига олиб келинган.

Қайд этилишича, уларга нисбатан Маъмурий жавобгарлик тўғрисидаги кодекснинг 195-моддаси (Ички ишлар органлари ходимларининг ўз хизмат бурчларини бажаришларига қаршилик кўрсатиш) ва 194-моддаси (Ички ишлар органлари ходимининг қонуний талабларини бажармаслик) билан тегишли тартибда маъмурий баённома расмийлаштирилган.

Эслатиб ўтамиз, аввалроқ Қорақалпоғистонда ИИБ ходимлари ака-укани калтаклагани айтилаётгани хабар қилинганди. Шунингдек, Навоийда ИИБ ходимлари ногирон аёлни ургани ва Тошкент вилоятида ички ишлар ходимлари ва депутатлар ўртасида жанжал юзага келгани маълум қилинган.