Қонунчилик палатаси депутатлари «Қишлоқ хўжалигига мўлжалланмаган ер участкаларини хусусийлаштириш тўғрисида»ги қонунни ўзгартиришга доир қонун лойиҳасини биринчи ўқишда маъқуллади. Депутат Дониёр Ғаниев ҳужжатдаги бир қатор камчиликлар ҳақида маълумот берди.

Унда айтилишича, лойиҳанинг 11-моддасида ер участкаларини ҳудудларнинг бош режалари ишлаб чиқилмаган тақдирда ҳам, ҳудуднинг маълум қисмини режалаштиришга оид бошқа ҳужжат билан хусусийлаштириш таклиф этилган. Лекин республика бўйича 74,8 фоиз шаҳар ва шаҳарчаларнинг, жумладан, Тошкент шаҳри ва Тошкент вилоятининг бош режаси умуман мавжуд эмас.

«Норма ҳокимлар томонидан бош режа тасдиқланишини яна йиллар давомида пайсалга солиниб, сити, саноат зонаси деган ёрлиқлар билан ер майдонларини маъмурий йўл билан тақсимлашга жуда катта ‘лазейка‘ очиб беради», — деган депутат.

Бундан ташқари, ер майдонлари нархларини белгилаш тартиби, давлат томонидан ер участкаларини қайта сотиб олиш тартиби ва мақсадлари, хусусийлаштирилиши мумкин бўлмаган ер участкалари рўйхати ҳамда кичик саноат ва махсус саноат зоналари иштирокчиларига берилган ер участкаларини хусусийлаштиришга оид нормалар бўйича ҳам бир қатор ноаниқликлар мавжуд экани айтиган.

«Улар бўйича ҳам ўз эътироз ва таклифларимни ишчи гуруҳга етказдим. Умид қиламанки, 2-ўқишга таклиф этиладиган қонун лойиҳасида фикрларим қонун ташаббускорлари ва масъул қўмита томонидан инобатга олинади», — деб ёзган депутат ўз постида.

Эслатиб ўтамиз, аввалроқ депутат Тошкент вилояти ҳокимини судга бергани хабар қилинганди. Шунингдек, Тошкент вилоятида ички ишлар ходимлари ва депутатлар ўртасида жанжал юзага келгани ва Андижонда депутатлар маҳаллий кенгаш масъулларидан норозилик билдириб, Президентга мурожаат билан чиққани маълум қилинган.