Кобул аэропорти кимнинг назоратига ўтиши маълум қилинди
«Толибон» ҳаракати матбуот котиби Забиҳуллоҳ Мужоҳид ҳаракат Кобулдаги аэропортнинг бир қисмини назорат қилаётгани ва тез орада бутун назорат уларнинг қўлига ўтишини маълум қилди. Бу ҳақда «РИА Новости» хабар берди.
Мужоҳиднинг сўзига кўра, Америка аэропортдаги бир нечта зоналардан чиқиб кетган.
«Биз аэропортдан чет эл қўшинларининг бутунлай чиқиб кетишини кутмоқдамиз. Тез орада аэропорт назорати бутунлай ‘Толибонʼ қўлига ўтади», — деган у.
Маълумот учун, 27 август, жума куни «Толибон» аэропортнинг ҳарбий қисмидаги ҳудуд ўз назоратига ўтганини эълон қилган. Кейинчалик Пентагон матбуот котиби Жон Кирби буни рад этган ва аэропорт ҳали ҳам АҚШ армияси назорати остида эканини айтган. 28 август куни «TOLO News» телеканали ҳаракат вакилларига таяниб, АҚШ ҳарбийлари Кобулдаги аэропортнинг учта кириш жойи ва бошқа жойларини тарк этгани, уларни «Толибон» назорат қилаётганини маълум қилган.
Аввалроқ Кобул аэропортида номаълум шахс ўзини портлатиб юборгани ҳақида хабар берилганди. Шунингдек, аэропорт яқинида кучли портлаш бўлгани маълум қилинган.
