Панжшердаги қаршилик кучлари қайси шарт билан «Толибон» ҳаракатини тан олишини маълум қилди. Бу ҳақда «Sputnik Афғонистон» хабар берди.

Маълум бўлишича, Панжшер қаршилик кучлари фақат террор муаммосини ҳал қиладиган ҳукумат билан музокара ўтказишни истайди. Бу бўйича ўз фикрларини вилоятдаги қаршилик фронти вакили Фаҳим Дашти россиялик мухбирга берган интервьюсида айтиб ўтган.

«Бизда ҳали ‘Толибон’ ҳаракати билан ИШИДга қарши операциялар тўғрисида шартнома йўқ. Гап бошқа масалалар қаторида терроризм муаммосини ҳам ҳал қиладиган ҳукумат тузилиши ҳақида кетмоқда», — деган у.

Таъкидланишича, Панжшердаги қаршилик кучлари терроризмга қарши курашда минтақанинг бошқа давлатлари билан ҳамкорлик қилишга тайёр. Лекин бу мамлакат келажаги тўғрисида «Толибон» ҳаракати билан принципиал келишувга эришилгандан кейингина содир бўлади. Қаршилик вакили ҳаракат билан тегишли музокаралар яхши кетаётганини айтган.

«Агар бу содир бўлмаса ва ‘Толибон’ ўз қарашлари билан ҳукумат тузса, биз бу ҳукуматни тан олмасликни ва ҳаракатга қарши санкциялар киритишни талаб қиламиз», — деган Дашти қўшимча қилиб.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.

Аввалроқ «Толибон» ҳаракати Панжшердаги ижтимоий вазиятни қийинлаштираётгани айтилганди. Шунингдек, ҳаракат Панжшердаги қаршилик кучлари пистирмасига тушгани хабар қилинган.