Россиядаги дўконларнинг биридан ўзбекистонлик аёлнинг жасади топилгани ҳақида хабар берилганди. Мамлакат ҳуқуқ-тартибот идоралари ходимлари тезкор текширув давомида аёлнинг қотилини ҳибсга олди. Бу ҳақда Россия Ички ишлар вазирлигининг Санкт-Петербург ва Ленинград вилояти бош бошқармаси матбуот хизматига таяниб, «Невские новости» хабар берди.

Маълум бўлишича, Комсомол кўчасидаги «Невские берега» дўконидан 28 август куни 39 ёшли ўзбекистонлик аёлнинг жасади топилган. У бу қандолат дўконида сотувчи бўлиб ишлаган. Жабрланувчининг танасида пичоқ яралари ва бўғилиш белгилари аниқланган. Аёлни ўлдиришда гумонланган шахс Москва аэропортида қўлга олинган.

Таъкидланишича, гумондор 32 ёшли ўзбекистонлик эркак бўлиб, у аёл ишлаган қандолат дўконига қўшни дўконда юкловчи бўлиб ишлаган. Тахминларга кўра, у аёлни қарз туфайли ўлдирган.

Аввалроқ Москвада ўзбекистонлик маст эркак патруль хизмати ходимини тишлаб олгани ҳақида хабар берилганди. Шунингдек, Россияда ўзбекистонлик эркак 3 нафар қизни зўрлашда айбланиб, қамоққа олинганди.