Шавкат Мирзиёев 30 август куни Германия президенти Франк-Вальтер Штайнмайер билан телефон орқали мулоқот қилди. Бу ҳақда Президент матбуот хизмати хабар қилди.

Маълум бўлишича, суҳбат аввалида Германия президенти Ўзбекистон халқини мамлакат мустақиллигининг 30 йиллиги билан қутлаб, тинчлик-осойишталик, фаровонлик, катта муваффақиятлар ва равнақ тилаган.

Қайд этилишича, мулоқотда икки томонлама ва минтақавий ҳамкорликнинг долзарб масалалари муҳокама қилинган. Ўзбекистон–Германия ҳамкорлигининг асосий йўналишлари белгилаб олинган. Шавкат Мирзиёев Германия президентга Ўзбекистонда коронавирус инфекцияси тарқалишига қарши курашишда кўрсатилган техник-маслаҳат кўмаги учун самимий миннатдорлик билдирган.

Таъкидланишича, ўзаро савдо ва инвестицияларни кўпайтириш, ишбилармонлик ташаббусларини, Германиянинг «Siemens», «Bosch, «Man», «Claas», «Knauf» ва бошқа кўплаб етакчи компаниялари иштирокида юқори технологик тармоқлардаги саноат кооперацияси лойиҳалари ва инфратузилмани модернизация қилиш дастурларини қўллаб-қувватлашга алоҳида эътибор қаратилган.

Хабар берилишича, президентлар Ўзбекистон мактаблари ва олий таълим муассасаларида немис тилини чуқур ўрганиш масалаларига алоҳида тўхталган. Ўзаро гуманитар алмашинувларни бундан буён ҳам фаол давом эттиришга келишиб олинган.

Бундан ташқари, Афғонистондаги вазият юзасидан ҳам фикр алмашилган. Франк-Вальтер Штайнмайер фуқароларнинг Ўзбекистон орқали транзит йўли билан эвакуация қилинишида кўрсатилган катта ёрдам учун яна бир бор ташаккур изҳор этган. Биргаликдаги инсонпарварлик операцияларини амалга ошириш учун яқин алоқаларни давом эттириш муҳим экани таъкидланган.

Эслатиб ўтамиз, аввалроқ Шавкат Мирзиёев Абу Даби валиаҳди билан телефон орқали мулоқот қилгани хабар қилинганди. Шунингдек, Президент Франция президенти билан телефон орқали суҳбатлашгани ва Шавкат Мирзиёев Қирғизистон раҳбари билан телефон орқали мулоқот қилгани маълум қилинган.