«Толибон» ҳаракатининг Қатар сиёсий идораси вакили Муҳаммад Сухайл Шоҳин Афғонистон президенти бўлиб ишлаган ва мамлакатдан қочган Ашраф Ғани ноқонуний йўл билан олинган барча маблағларни қайтариши кераклигини айтди. Бу ҳақда «Doha News» хабар берди.

Шоҳиннинг сўзларига кўра, Ғани Афғонистон халқидан унга тегишли бўлмаган пулни олган бўлса, уни қайтариши керак.

«Нега у одамларнинг пулини ўзлаштириб олиши керак?» — деган «Толибон» вакили ва Ғанининг Афғонистондан қочишини хато деб атаган, чунки ҳаракат ҳокимиятни тинч йўл билан ўтказишни таклиф қилганини айтган.

«Бизнинг  жангчиларимиз ҳокимиятни тинч йўл билан ўтказиш учун уни Кобул дарвозасида кутишди, лекин у кутилмаганда қочиб кетди, ҳукуматни ташлаб, шаҳарда хавфли вазиятни яратди, тасодифан отишмалар бошланди», — дея қўшимча қилган у.

Маълумот учун, «Толибон» ҳаракати 15 августда Афғонистоннинг барча ҳудуди устидан назорат қилаётганини хабар қилган. Мамлакат президенти бўлган Ашраф Ғани Афғонистондан қочиб кетган. Дастлаб унинг Тожикистонда, кейинчалик Ўзбекистонда экани айтилган, аммо давлат раҳбари БААда экани маълум бўлган. Ғани афғон халқига мурожаат қилиб, ўзининг кетиш сабабини очиқлаган. Унга кўра, у мамлакатда ортиқча қон тўкилишини хоҳламаган. Кейинчалик Ғани Афғонистонни тарк этаётганида ўзи билан ғазнадан 169 миллион доллар пул олиб кетгани айтилган. Афғонистоннинг қочган президенти буни рад этган ва ўзи билан нималар олиб кетганини маълум қилган.

Аввалроқ Афғонистон вице-президенти Ғани ҳукумати қулашининг сабабларини маълум қилганди. Шунингдек, «Толибон» ҳаракати Ашраф Ғанига амнистия таклиф қилган.