Қозондаги 175-гимназияда отишма уюштирган Ильназ Галявиевга амбулатор шароитида даволаниш буюрилиши мумкин. Бу ҳақда «Life» хабар берди.

Маълум бўлишича, буни адвокат Максим Калинов айтган. «Ҳозирги вақтда у мажбурий тиббий чораларга йўналтирилади. Стационар даволаниш ўрнига амбулатор даволаниш бўлишини истисно қилиб бўлмайди», — деган у. Июль ойида Россия пойтахти жамоатчилик назорати комиссияси ижрочи котиби Алексей Мельников Ильназ Галявиев Москвадаги руҳий касалликлар шифохонасига ўтказилганини айтган.

Эслатиб ўтамиз, Қозон шаҳридаги мактабга 11 май куни қуролланган шахс кириб, ўқувчиларга қарата ўқ уза бошлаган. У 19 ёшли Ильназ Галявиев бўлиб, 4 йил олдин мактабни битирган, ҳозирда коллежда ўқиган. Воқеадан бир неча кун аввал эса академик қарздорлиги сабаб коллеждан ҳайдалган.

Отишмада, Татаристон президентининг сўзларига кўра, 9 киши ҳалок бўлган: 7 нафар бола ва 2 ёши катта киши. Бундан ташқари, 20 дан ортиқ одам жароҳатланган. Юқоридаги 9 кишидан ташқари яна 2 мактаб ўқувчиси 3-қаватдан сакраш оқибатида ҳалок бўлган.

Аввалроқ Галявиев нега отишма содир қилганини айтиб берганди. Шунингдек, у касалхонада даволанишдан бош тортган.