Россиянинг Санкт-Петербург шаҳрида 2020 йилнинг декабрида ҳибсга олинган, ёш қизларнинг номусига тегишда гумон қилинаётган 45 ёшли ўзбекистонлик эркак яна бир қанча жиноятларда айбланди. Бу ҳақда ҳуқуқ-тартибот идораларидаги манбага таяниб, «78.ru» хабар берди.

Маълум қилинишича, айбланувчи Хасанская кўчасидаги уйда яшаётганида шантаж орқали тўққизинчи синф ўқувчисини унга шахсий фотосуратларини юборишга мажбур қилган. Шу билан бирга, у саккизинчи синф ўқувчиси билан жинсий мавзуларда ёзишмалар олиб борган ва еттинчи синф ўқувчисига ўзининг шахсий расмларини юборган.

Шунингдек, ўзбекистонлик эркак 2019 йилда 11 ёшли қизнинг номусига теккан. Таъкидланишича, эркакка нисбатан ҳозирда янги жиноят иши қўзғатилган. У ҳибсда қолмоқда. Тергов ишлари эса давом этмоқда.

Аввалроқ Россияда 12 ёшли қизни зўрлаган ўзбекистонлик эркак қўлга олингани ҳақида хабар берилганди. Шунингдек, Россияда 34 ёшли аёлни зўрлаган 3 ўзбекистонлик йигит ҳибсга олингани маълум қилинган.