«Толибон» ҳаракати Панжшерга яна ҳужум қилди
«Толибон» ҳаракати Аҳмад Масъуд бошчилигидаги қаршилик кучлари жойлашган Панжшер вилоятига яна ҳужум қилди. Бу ҳақда «Sputnik Тожикистон» хабар берди.
Маълум қилинишича, айни пайтда қаршилик кучлари ва ҳаракат ўртасида Хавак довонида шиддатли жанг бўлиб ўтмоқда. Йўқотишлар ва жангарилар сони ҳақида маълумот берилмаган.
Маълумот ўрнида, «Толибон» ҳаракати АҚШ қўшинларининг олиб чиқиб кетилиши фонида Панжшер вилоятига 31 август куни бостириб киришга уринганди.
Маълум бўлишича, қаршилик кучларининг олдинги постларига икки томондан ҳужум қилинган. Ҳужумлар Бағлон вилоятининг Андароб туманидан, шунингдек, Жабал-ус-Сираж шаҳридан амалга оширилган. Икки томонлама тўқнашувда қаршилик кучлари «Толибон» ҳаракати ҳужумини қайтарган.
Таъкидланишича, ҳужум оқибатида ҳаракатнинг Андароб йўналишидаги йўқотишлари 85 кишини ташкил қилган, «Толибон»нинг 108 нафар жангчиси жароҳатланган. Жабал-ус-Сирож яқинидаги тўқнашувда эса ҳаракатнинг 12 нафар жангариси ўлдирилган, яна 26 нафари яраланган.
Панжшер қаршилик кучлари ҳимоячилари орасида ҳам ярадорлар борлиги қайд этилган. «Толибон» ҳаракати ҳозирча бу маълумотга изоҳ бермаган.
Аввалроқ Панжшер қаршилик кучлари «Толибон» ҳаракати билан келишув шартини маълум қилганди. Шунингдек, «Толибон» ҳаракати Панжшердаги қаршилик кучлари пистирмасига тушгани хабар берилган.
