АҚШ Украинага 3 млрд долларлик ёрдам беради
АҚШ Эксимбанки Украинага 3 миллиард доллар миқдорида иқтисодий ёрдам кўрсатади. Бу ҳақда Оқ уй расмий сайтида эълон қилинган баёнотда маълум қилинган.
Айтилишича, Америка маъмурияти вакили АҚШ ва Украина президентлари учрашуви арафасида ўтказилган матбуот брифингида бу ёрдам ҳақида маълумот берган. Шунингдек, мамлакатлар ўзаро англашув ва тижорий ҳамкорлик тўғрисида иккита меморандум имзолаши қайд этилган. Оқ уйнинг таъкидлашича, Украина президенти Владимир Зеленскийнинг ташрифи Киев ва Вашингтон ўртасидаги иқтисодий ҳамкорликни ривожлантиришга ёрдам беради.
Мамлакатлар раҳбарлари 1 cентябрда ўтказиладиган музокараларда иқлим инқирозидан чиқиш ва Украинанинг энергия хавфсизлигини мустаҳкамлаш бўйича янги ташаббусларни, шу жумладан, «Шимолий оқим-2» масаласини муҳокама қилади.
Аввалроқ Зеленский Жо Байден билан музокара ўтказиш учун АҚШга етиб келганди. Шунингдек, Россия Зеленский ва Байден учрашувидан нима кутаётгани маълум бўлган.
