«Толибон» ҳаракати АҚШ ўз қўшинларини мамлакатдан олиб чиқиб кетиши билан Афғонистонда янги ҳукумат туза бошлади. Бу ҳақда «Спутник» хабар берди.

Маълум бўлишича, ҳукумат таркибини шакллантириш бўйича дастлабки учрашувлар аллақачон бўлиб ўтган. Ташқи ишлар вазири этиб «Толибон» ҳаракатининг энг нуфузли одамларидан бири мулла Абдулғани Бародар тайинланган.

Шунингдек, Ички ишлар вазирлиги ва Мудофаа вазирлигига тайинланган раҳбарларнинг исмлари очиқланган. Унга кўра, «Толибон» ҳаракати асосчиси Муҳаммад Умарнинг ўғли Мулла Муҳаммад Ёқуб бундан буён мудофаа вазири сифатида фаолият юритади. Ҳаракатнинг яна бир вакили Ҳалил Ҳаққоний эса ички ишлар вазири лавозмига тайинланган. Қайд этилишича, ҳаракат Вазирлар Маҳкамасининг якуний таркибини 3 cентябргача эълон қилади.

Аввалроқ «Толибон» ҳаракати Афғонистонда таълим қандай ташкил этилишини маълум қилганди. Шунингдек, ҳаракат янги ҳукумат ҳақида батафсил маълумот берган.