«Толибон» ҳаракати ҳали эгалланмаган Панжшер вилоятига ҳоким тайинлади. Бу ҳақда «РИА Новости» хабар берди.

Маълум бўлишича, бу маълумотни «Толибон» ҳаракати раҳбарияти вакили Амир Хон Мутаки берган. Таъкидланишича, у Панжшердаги қаршилик кучларини «Толибон» ҳаракатига қўшилишга чақирган.

Аввалроқ Мутаки ҳаракатнинг Афғонистон қаршилик фронти кучлари билан Панжшердаги музокаралари ҳеч қандай натижага олиб келмаганини айтганди. Унинг қайд этишича, «Толибон» ҳаракати жангарилари вилоят яқинида жойлашган.

«Толибон» ҳаракати август ойининг бошида Афғонистондаги ҳукумат кучларига қарши ҳужумини кучайтирган ва 15 августда пойтахтга кирган. Ҳаракат назорат қилмайдиган ягона вилоят Панжшер бўлиб, у Кобулнинг шимоли-шарқидаги тоғли ҳудудда жойлашган. У ерда фаолият юритаётган Афғонистон қаршилик фронти етакчиси 2001 йил 9 сентябрда террорчилар томонидан ўлдирилган Аҳмад Шоҳ Масъуднинг ўғли Аҳмад Масъуд ҳисобланади.

Аввалроқ «Толибон» ҳаракати Аҳмад Масъудни йўқ қилмоқчилиги айтилганди. Шунингдек, «Толибон» ҳаракати Панжшерга яна ҳужум қилган.