Ўзбекистондан 37 нафар фуқаро қурилиш ва бошқа соҳаларда ишлаш учун Россияга жўнаб кетди. Бу ҳақда Ташқи меҳнат миграцияси агентлиги хабар берди.

Маълум қилинишича, агентлик ҳамда Россиянинг «РЖДстрой» акциядорлик жамияти ўртасида темир йўл қурилишида ишлаш учун бўш иш ўринларига Ўзбекистон фуқароларини ишга жалб қилиш бўйича келишувга эришилган. Унга асосан, танловдан муваффақиятли ўтган 7 нафар фуқаро тиббий кўрикдан ўтказилиб, суғурта хизматлари кўрсатилган.

Қайд этилишича, улар Бухоро халқаро аэропортидан Иркутск вилоятига вақтинчалик меҳнат фаолиятини амалга ошириш учун жўнатилган. Таъкидланишича, бу фуқароларнинг йўл ва турар жой билан боғлиқ барча харажатлари иш берувчи томонидан қопланмоқда.

Шунингдек, агентлик ва Россиянинг «ПСП» масъулияти чекланган жамияти ўртасида имзоланган келишувга асосан 25 нафар фуқаро Тошкент–Новосибрск–Благовешенск йўналишидаги авиарейс, «Балтранс» корхонаси ўртасида имзоланган келишувга асосан 5 нафар фуқаро Тошкент–Санкт-Петербург йўналишидаги авиарейс орқали ишлаш учун Россияга жўнатилган.

Хабар қилинишича, хорижга вақтинчалик меҳнат фаолиятини амалга ошириш учун кетаётган фуқаролар билан тарғибот-ташвиқот ишлари олиб борилиб, уларга тарқатма материаллар берилган.

Аввалроқ Россияга 33 нафар ўзбекистонлик ишлаш учун жўнаб кетгани, Ўзбекистондан 40 нафар фуқаро Россияга ишлаш учун жўнатилгани ва 91 нафар фуқаро ишлаш учун Россияга кетгани хабар қилинган.