Германия Ўзбекистонга ковидга қарши 20,6 миллион евролик препарат юборилиши ҳақида хабар берилганди. Соғлиқни сақлаш вазирлиги ахборот хизмати дори воситалари Тошкентга етиб келганини маълум қилди.

Таъкидланишича, Тошкент Халқаро аэропортида ушбу дори воситаси қадоқларини қабул қилиб олиш маросими бўлиб ўтган. Унда Соғлиқни сақлаш вазирлиги масъуллари, Германиянинг Ўзбекистондаги элчихонаси ходимлари ва журналистлар иштирок этган.

Қайд этилишича, «Casirivimab/Imdevimab» (Швейцариянинг «Roche» фармацевтика компаниясидан) COVID-19’га қарши сунъий «антитаначалар коктейл»и бўлиб, ҳозирда препарат вируснинг янги штамларига чидамли ягона препарат ҳисобланади. Тадқиқот натижаларига кўра, препарат касалхонага ётқизиш ва коронавирусдан ўлим даражасини 70 фоизга камайтиргани ва касаллик аломатларининг давомийлигини 14 кундан 10 кунгача қисқартиргани айтилмоқда.

Эслатиб ўтамиз, аввалроқ Ўзбекистонга 90 минг доза «Спутник V» вакцинаси келтирилгани хабар қилинганди. Шунингдек, Ўзбекистонга ўзбек–хитой вакцинасининг яна 3 миллион дозаси келтирилгани ва Ўзбекистонга АҚШдан «Mоderna» вакцинасининг 3 миллион 60 дозаси олиб келингани маълум қилинган.