Украина президенти Владимир Зеленский АҚШ президенти Жо Байден билан бўлиб ўтган Вашингтондаги учрашувини баҳолади. Бу ҳақда «ТАСС» хабар берди.

Зеленскийнинг сўзларига кўра, учрашув оддий руҳда ўтган. Президент журналистларга берган интервьюсида Америка томони Украина делегациясига ҳеч қандай шикоят қилмаганини айтган.

«Умуман олганда, учрашув самарали ўтди. Оддий эркаклар суҳбати бўлди», — дея Зеленский музокараларга таъриф берган. Унинг қўшимча қилишича, учрашув режалаштирилганидек бир соат эмас, икки соат давом этгани «томонлар мулоқотга қизиқиш билдирагани ва бу мулоқот натижаси» экани билан изоҳлаган.

Шунингдек, у учрашув пайтида ўзини ёмон ҳис қилмаганини таъкидлаган. «Америка Қўшма Штатларидан Украинага, менга, жамоамга ҳеч қандай салбий муносабат бўлмади. Ҳеч нарса, ортиқча ҳаракат ва сўз ҳам йўқ эди», — дея президент «бу жуда яхши» эканини айтган.

Шу билан бирга, давлат раҳбари Байденнинг Украинага ташрифини муҳокама қилишни эсдан чиқариб қўйганини таъкидлаган. «Ростини айтганда, мен буни учрашувдан кейин эсладим, АҚШ президентининг ташрифи ҳақида батафсилроқ гапириш керак эди», — деган Зеленский.

Аввалроқ Россия Зеленский ва Байден учрашувидан нима кутаётгани маълум қилинганди. Шунингдек, Украина президенти АҚШда 277 млрд долларлик «Украинани ўзгартириш режаси»ни тақдим этгани хабар берилган.