Аҳмад Масъуд бошчилигидаги қаршилик кучлари жойлашган Панжшерга ҳужум қилган «Толибон» ҳаракати пистирмага тушгани айтилмоқда.

Таъкидланишича, ижтимоий тармоқларда эълон қилинган видеода қаршилик кучлари ҳамда пистирмага тушган ҳаракат аъзолари ўртасида кечаётган жанг кўрсатилган.

Маълумот ўрнида,  Панжшер қаршилик кучлари «Толибон» ҳаракатининг 100 нафардан ортиқ жангарисини йўқ қилгани хабар берилганди.

Маълум бўлишича, ҳаракат бу вилоятга қарши янги ҳужум бошлаган. Ҳодиса тафсилотларини қаршилик кучлари вакили Фаҳим Дашти маълум қилган. Унинг сўзларига кўра, ҳужумда юздан ортиқ ҳаракат жангариси ўлдирилган.

Айтилишича, ҳужум 31 август куни Панжшер шимолида бошланган. «Улар жиддий мағлубиятга учради. Улардан 115 нафари ўлдирилди, 200 нафарга яқини яраланди, 35 нафари асирга олинди», — деган Дашти.

Таъкидланишича, қаршилик кучлари «Толибон» ҳаракатининг баъзи оғир қуролларини йўқ қилган. Натижада улар чекинишга мажбур бўлган.

«Толибон» ҳаракати 15 августда Кобулга кириб, Афғонистоннинг деярли бутун ҳудудида назорат ўрнатилганини эълон қилган. Ҳаракат ҳозирча ўз назоратига фақат Панжшер вилоятини ололмаган. У ердаги қаршилик кучларига Аҳмад Масъуд ва Афғонистон вице-президенти Амрулла Солиҳ етакчилик қилаётгани айтилган. Солиҳ президент Ашраф Ғани қочиб кетганидан кейин ўзини давлат бошлиғи деб эълон қилган эди.

Аввалроқ «Толибон» ҳаракати Панжшерга яна ҳужум қилгани айтилганди. Шунингдек, «Толибон» ҳаракати Панжшердаги қаршилик кучлари пистирмасига тушган.