Россия президенти Владимир Путин Шарқий иқтисодий форум давомида коронавируснинг келиб чиқишига оид хабарларга муносабат билдирди. Бу ҳақда «Коммерсант» хабар берди.

Маълум қилинишича, форум давомида Путин коронавируснинг келиб чиқишига оид мавзуни сиёсатлаштиришга эмас, балки пандемия ва унинг оқибатлари билан биргаликда курашишга чақирган. Жаҳон ҳамжамияти пандемияга қарши курашиш учун бирлашиши ва вируснинг келиб чиқиши масаласини сиёсатлаштиришга қарши туриши кераклигини Хитой раиси Си Цзиньпин ҳам айтган.

«Менимча, бугунги кунда сиёсатлаштиришдан воз кечиб, пандемиянинг ўзи ва унинг оқибатларини бартараф этиш учун биргаликда курашиш давлатлар олдидаги муҳим вазифадир. Бу бутун инсоният учун жуда муҳим», — дея таъкидлаган Путин.

Унинг таъкидлашича, вируснинг келиб чиқиш сабаблари бўйича барча тадқиқотлар объектив материаллар асосида олиб борилиши керак. Зеро, бу мавзуни сиёсатлаштириш бошланганда хулосаларга бўлган ишонч дарҳол камаяди.

Аввалроқ Путин коронавирусга қарши қайси вакцина билан эмланганини маълум қилганди. Шунингдек, у коронавирусни қандай енгиш мумкинлигини айтган.