Афғонистон миллий қаршилик ҳаракати Кобул шимолидаги Парвон вилояти маркази — Чориқор шаҳрини ўз назоратига олганини, «Толибон» ҳаракати 2 cентябрь куни бўлиб ўтган жанглар оқибатида катта талафот кўрганини маълум қилди. Бу ҳақда «Интерфакс» хабар берди.

Қаршилик кучлари вакилларининг айтишича, ҳаракат 2 сентябрь куни Панжшер водийсига бир неча йўналишлардан, хусусан, Ховак довонидан, Андароб водийси орқали Саланг довонидан, Шотул туманидан, шунингдек, Парвон вилоятининг Гулбаҳор шаҳридан ҳужум қилган.

Ҳужум бошланишидан олдин ҳаракат Панжшернинг алоқа ва интернет хизматлари, шунингдек, электр таъминотини ўчиришга мажбур қилган.

Қайд этилишича, ҳар уч йўналишда ҳам «Толибон» ҳаракати катта талафот кўрган, жанг майдонида ўнлаб жангарилар жасади қолган. Бир неча ўнлаб ҳаракат аъзолари таслим бўлган. Ховак довонида ҳаракат камида 100 кишини йўқотган, Шотул туманидаги жангда ҳам тўлиқ мағлубиятга учраган.

Аввалроқ Панжшер қаршилик кучлари «Толибон» ҳаракати билан келишув шартини маълум қилганди. Шунингдек, «Толибон» ҳаракати Панжшердаги қаршилик кучлари пистирмасига тушгани хабар берилган.