АҚШ президенти Жо Байден мамлакат Адлия вазирлигига 2001 йил 11 сентябрь терактлари билан боғлиқ махфий ҳужжатларни махфийликдан чиқаришни топширди. Бу ҳақда «Reuters» хабар берди.

Байденнинг сўзларига кўра, 11 сентябрь воқеаларининг 20 йиллиги арафасида, Америка халқи теракт ҳақида ҳукумат биладиган маълумотларни билишга лойиқ.

«Америка ҳукумати учун ошкораликни таъминлаш ва махфийликни фақат маълум ва зарур ҳолларда сақлаш жуда муҳим», дейилган мамлакат президентининг мазкур теракт тафсилотларини ошкор қилиш ҳақидаги фармонида.

Таъкидланишича, махфий маълумотларни терговдан олиб ташлаш Байденнинг сайловолди ваъдаларидан бири бўлиб, унга бу ҳақда терактнинг 20 йиллиги арафасида фожиа қурбонларининг оилалари эслатган.

Маълумот учун, АҚШда 2001 йил 11 сентябрда қурбонлар сони бўйича тарихдаги энг йирик теракт содир бўлган. Террорчиларнинг тўрт гуруҳи режалаштирилган тўртта йўловчи самолётини ўғирлаб кетган, улардан иккитаси Нью-Йоркдаги Манҳэттен Жаҳон Савдо Маркази минораларига юборилган, оқибатда иккала осмонўпар бино қулаб тушган. Учинчи лайнер Вашингтон яқинидаги Пентагон биносига учирилган. Тўртинчи самолёт экипажи ва йўловчилари самолёт бошқарувини террорчилар назоратидан олишга уринган, самолёт Пенсильвания штатидаги далага қулаган. Ҳужумларда 19 худкушдан ташқари 2977 киши ҳалок бўлган, яна 24 киши бедарак йўқолган.

Аввалроқ АҚШда 11 сентябрдаги теракт билан боғлиқ баъзи маълумотларни очиқлаш таклиф қилинганди. Шунингдек, Кобулда содир бўлган теракт тафсилотлари маълум қилинган.