Россиянинг Санкт-Петербург шаҳрида 2 сентябрь куни ижарага олинган машинани ўғирлаган ўзбекистонлик йигитлар йўл-транспорт ҳодисасига учради. Бу ҳақда ҳуқуқ-тартибот идоралари манбасига таяниб, «78.ru» хабар берди.

Маълум бўлишича, полиция 2 сентябрь соат 01:15 атрофида (Тошкент вақти билан 03:15да) Испитателей проспекти ва Байконурск кўчалари кесишмасида аварияга учраган «Renault Kaptur» автомобилини тўхтатган. Машинани бошқарган йигитлар эса қочган, аммо қисқа таъқибдан кейин улар қўлга олинган.

Таъкидланишича, қўлга олинганлар 20 ва 21 ёшли Ўзбекистон фуқаролари бўлган. Маълум бўлишича, улар бировнинг ҳисобига машинани ижарага олган ва уни ўғирлаган. Натижада йигитлар полиция бўлимига олиб борилиб, уларга нисбатан маъмурий баённома тузилган. Шундан сўнг улар изоляторга жойлаштирилган. Шу билан бирга, жиноий иш қўзғатилган.

Аввалроқ Россияда давлатлараро қидирувда бўлган ўзбекистонлик аёл ва 2 эркак қўлга олингани ҳақида хабар берилганди. Шунингдек, Россияда патруль ходими ўзбекистонлик йигитни ўт очиш орқали тўхтатгани маълум қилинган.