Афғонистоннинг Панжшер вилоятидаги миллий қаршилик фронти ва Аҳмад Масъуд тинчлик музокаралари тўғрисидаги декларациясини эълон қилди. Бу ҳақда «Sputnik Афғонистон» хабар берди.

Маълум бўлишича, қаршилик кучлари урушни дарҳол тугатишни кўзда тутган «Афғонистон уламолари» декларациясини маъқуллашини қайд этган. Қаршилик фронти ушбу декларация талабларини бажаришга ўз ҳиссасини қўшиш учун бир нечта таклифлар берган. Унга кўра, қаршилик кучлари жанговар ҳаракатларни дарҳол тўхтатиш ва музокараларни давом эттириш фикрига қўшилган ва «Толибон» ҳаракатининг ҳам шундай қилишига умид билдирган.

Шунингдек, улар агар ҳаракат Панжшер ва Андараб водийсидаги ҳарбий ҳаракатларни тўхтатса, барқарор тинчликка эришиш учун дарҳол жанговар ҳаракатларни тўхтатишга тайёрлигини ва катта йиғилишда уламолар билан кенг қамровли мулоқотни давом эттиришини маълум қилган. Бундан ташқари, қаршилик кучлари «Толибон» ҳаракатининг ислом ва гуманитар ҳуқуқнинг бу талабларини жиддий қабул қилиб, бажаришига умид қилиши айтилган. Ўз навбатида, қаршилик фронти ўз кучларига жанговар ҳаракатлардан тийилишни буюрган.

Аввалроқ Панжшердаги қаршилик кучлари яна бир туманни «Толибон» ҳаракатидан қайтариб олганди. Шунингдек, «Толибон» ҳаракатининг Панжшерга қилган навбатдаги ҳужуми тафсилотлари маълум бўлган.