«Айда» тўфонидан кейин Мексика кўрфазида нефть сизиб чиқишни бошлади. Бу ҳақда «Al Jazeera» хабар берди.

Айтилишича, нефтнинг қаердан сизиб чиқаётгани ҳали аниқланмаган. Тахминларга кўра, нефть сув ости қувуридан оқиб чиққан. Суюқлик қирғоқ бўйлаб 20 километргача ёйилган. «Clean Gulf Associates» нефть тўкилишига қарши курашувчи нотижорат ташкилоти ҳодисанинг оқибатларини бартараф этиш учун қирғоқ бўйига тўсиқ ўрнатган. АҚШ Соҳил хавфсизлик хизматининг маълум қилишича, нефтни тозалаш учун махсус гуруҳлар ва кемалар жалб қилинган. Ҳозирча сув атиги 160 литрга яқин суюқликдан тозаланган.

Қайд этилишича, суюқлик тахминан Луизиана штатининг Порт-Фуршон шаҳридан 3 километр жанубда сизиб чиққан. Таъкидланишича, у Хьюстондаги «Talos Energy» компаниясига тегишли сув ости қувуридан оқиб чиқаётган бўлиши мумкин. Бу компания ҳозирча қувур ёрилганини тасдиқламаган. Лекин ўз маблағи ҳисобидан сув остига шўнғувчилар гуруҳини ёллаган. Бундан ташқари, улар «Clean Gulf Associates» компаниясига пул тўлаган.

Аввалроқ дунёнинг энг йирик нефть қувури жиддий хавф остида экани айтилганди. Шунингдек, Мексика кўрфазида сув остида Мексиканинг «Pemex» нефть-газ компаниясига тегишли қувур линиясида кучли ёнғин содир бўлган.